LAOAG CITY – Umaboten iti 20 nga ektarya ti kabanbantayan iti Solsona-Apayao road ti naapekataran iti forest fire.
Segun ken ni Vice Mayor Joseph de Lara, nangrugi ti uram idi rabii.
Inbatad na nga apaman a napan da a mismo iti bantay kadua na ni Ilocos Norte Police Provincial Office Provincial Director Julius Suriben ket nalawa ti sakop ti uram ken arig nga agwarwaras ti apoy gapu ta napigsa ti angin.
Gapu iti daytoy, inpakaammo ni de Lara a dagus a naireport ken ni Gobernador Matthew Marcos Manotoc ken naiyuswat ti emergency meeting kadua da dagiti kameng ti Philippine airforce ken provincial director para kadagiti maaramid a wagas iti panangsebseb ti uram.
Kuna na a naiyuswat ti inspection kadagiti pagtawingan ti danom ti helicopter iti dam iti ili ti Piddig ken immunan nga adda dagiti nakolektar a danom manipod iti Paoay lake ken isu ti nausar iti aerial response iti uram.
Kabayatanna, kuna ni de Lara a gapu iti napigsa nga angin ket naisardeng ti panagtawing ti chopper ti danom iti Paoay lake ken isu ti nangibayag iti pannakaresponde ti uram.
Innayun na a daytoy met ti mabanbantayan iti agdama ken iti posible a panagwaras ti uram iti ad-ado a paset ti kabanbantayan.
Naamoan a karaman kadagiti nagresponde a bombero ken dagiti kameng ti BFP Dingras, Banna, Marcos, Nueva Era, Bacarra, Laoag City, Batac City ken INWD Water Truck.
Immuna iti daytoy, kuna ni de Lara a posible a nairanta ti pannakauram ti kabanbantayan ken saan nga aksidente.
Nu pay kasta, nagpanawagan pay ti bise mayor iti publiko a saan a dadaelen ti aglawlaw gapu ta isu ti saripda manipod iti didigra kas iti layus.
