LAOAG CITY – Agdagup ti maysa a milyon pito gasut pito pulo ket maysa a ribu a pisos ti “cash assistance” nga inpaay ti He Sha Prime Sand and Gravel Aggregates Philippines, Inc. ti naidanon kadagiti umili iti Metro Lapaz a karaman kadagiti maapektaran iti maisayangkat a “Padsan River restoration” wenno iti panagkutkut iti karayan Padsan.
Daytoy ti inpakaammo ni Engr. Judith Guinyang, Provincial Mining Operations Officer ti gobierno probinsial ti Ilocos Norte wenno PGIN.
Inlawlawagna nga indauloan ni Gob. Matthew Marcos Manotoc ken ti He Sha ti pannakaisayangkat ti nasao nga aktibidad iti Laoag Central Terminal.
Impalgakna a ti pannakaipaay ti nasao a “cash assistance” ket paset iti Corporate Social responsibility ti nadakamat a korporasyon.
Inbunannagna a tallo gasut innem a pulo ket innem dagiti mangngalap manipud iti nadakamat a barangay a naipaayan ti tulong.
Inbatad ni Guinyang a tallo gasut uppat a pulo ket lima kadagitoy ti awan ti sabali a pagsapulanda no saan a ti panagkalap ken dagitoy ket naipaayan ti lima ribu a pisos iti tunggal maysa idinto a dagiti duapulo ket tallo nga adda ti sabali a trabahoda ket immawat iti dua ribu a pisos.
Maipalagip nga idi bulan ti Disiembre ket immunan a naipaayan ti tulong dagiti mangngalap iti Metro Gabu ditoy siudad ti Laoag.
Naammoan nga iti agdama ket agsagsagana pay laeng ti He Sha para iti pannakakutkut ti karayan padsan.
