LAOAG CITY – Napilaan ti kaso nga estafa dagiti agkabsat nga isuda John Paul Alejandro Navalta ken Evelyn Alejandro Navalta, agpada a residente iti Lagasca Street, Corner Magat Salamat, Brgy. 12 San Isidro ditoy ciudad ti Laoag.
Daytoy ket kalpasan nga inlakoda iti maysa a van a naitalek kadakuada.
Basar ti imbestigasion, intalek ti biktima a ni Mr. Juanito Susa Julian, agtawen ti 75, taga Brgy. 12, San Isidro ditoy ciudad ti Laoag ngem agdama nga agnanaed iti Brgy. 59-B, Dibua North ditoy ciudad ti lugan na kadagiti suspek gapu ta idi Abril 2, 2016 ket pimmanaw daytoy iti pagilian .
Nupay kasta, iti panagsubli ti biktima idi Disiembre 25, 2023, naamoan na ken ni Evelyn Navalta a nailako ti lugan na nga awan ti pammalubos na.
Kabayatanna, nakita iti verification a naiyakar ti lugan ken ni Lemiel M. Islao, a sinuportaran ti Deed of Absolute Sale a napetsaan iti June 23, 2020, a mapapati nga addaan iti palsipikado a pirma ti biktima bayat ti kaadda na iti ballasiw-taaw gapu ta inpasingkedna nga awan ti pammalubos na iti panangilako dagiti suspek iti lugan na.
