LAOAG CITY – Inpakaammo ni Bombo International News Correspondent Manny Pascua manipud idiay Hawaii, United States of America nga agkurkurang dagiti agpapaay kadagiti health services iti Hawaii.
Segun kenkuana, no adda ti mai-refer wenno maiserrek ti maysa nga empleado a baro nga agtrabaho iti pasilidad ket mabayadan ti 100 dollars.
Inbatadna a masapul dagiti health services ti nayon nga empleado a manglitop kadagiti bakante a posision.
Kabayatanna, kuna ni Pascua a basar iti impormasionna ket nagayab pay ti kakadua ti Filipina nurse practitioner a sumangsango iti nagduduma a federal charges iti Estados Unidos a napan iti Las Vegas tapno agatendar ti Christmas party idi Disiembre iti napalabas a tawen.
Inlawlawagna a normal wenno business as usual dagiti Filipino nurse idiay Hawaii gapu ta saanda nga ammo ti naan-anay a detalye maipanggep iti napasamak.
Maipalagip a natiliw ti nasao a Filipina nurse practitioner kalpasan a naakusaran nga utek iti maysa a nalawa nga healthcare fraud scheme a maipagarup a nangluko iti Medicare ken TRICARE ti agarup US$1 bilyon wenno mapatta-patta a P51.6 bilyon.
