LAOAG CITY – Inpakaammo ni Bombo International News Correspondent Manny Pascua manipud idiay Hawaii, United States of America a saan laeng a Pilipino ti natiliwen maipanggep iti maipagarup a maanomalya a panagkolektar ti kuarta manipud iti Medicare.
Daytoy ket kalpasan a maysa a Filipina nurse practitioner ti sumangsango iti nagduduma a federal charges iti Estados Unidos kalpasan a naakusaran nga utek iti maysa a nalawa nga healthcare fraud scheme a maipagarup a nangluko iti Medicare ken TRICARE ti agarup US$1 bilyon wenno mapatta-patta a P51.6 bilyon.
Segun ken ni Pascua, ti Medicare ket maysa nga health insurance para kadagiti agtrabtrabaho iti Estados Unidos a maawatda inton tumaeng dagitoy.
Inbatadna a ti nasao nga health insurance ket isu ti agbaybayad kadagiti nataengan a maay-ayawanan nga adda iti ruar kadagiti pasilidad.
Inlawlawagna a nasken nga agbalin a napudno dagiti empleado maipapan iti panagbayad kadagiti hospital bill tapno saanda a sumango iti nadagsen a pannusa.
Immuna iti daytoy, nabigbig ti suspek a ni Marizel Yukee, residente ti Las Vegas a naiyisuan ti warrant of arrest babaen ti United States District Court for the Southern District of Texas.
Nakasoan daytoy ti conspiracy to commit healthcare fraud ken wire fraud, healthcare fraud, conspiracy to pay and receive illegal kickbacks ken money laundering.
