LAOAG CITY – Inpaganetget ni Bombo International News Correspondent Jash Jagonap manipud idiay United Kingdom a saan a nasken a babalawen ti minilyon nga healthcare workers gapu laeng iti inaramid ti Filipina nurse practitioner a sumangsango iti nagduduma a federal charges idiay Estados Unidos.
Segun kenkuana, ti napintas a reputasion dagiti Pilipino ket nabukel iti naunday a panawen iti babaen ti gaget, anus ken propesionalismo.
Inbatadna a dagiti Pilipino ti maibilang a maysa kadagiti kakalaingan nga healthcare professionals a saan laeng iti maysa a pagilian no diket iti intero a lubong.
Inlawlawagna a maipanpannakkel ti wagas a panagtrabaho ti maysa a Pilipino nangruna kadagiti agpapaay iti healthcare services.
Kunana nga awan met ti nagbaliwan ti pannakilangen-langen dagiti dadduma a nationality kadakuada a Pilipino iti baet ti nabara nga isyu a nakairamramanan ti maysa a Filipina nurse practitioner.
Innayonna a naiget ti panangtingiting ti ospital a pagpapaayanna kadagiti amin a dokumento tapno masigurado nga awan ti aniaman nga anomalya a mapasamak.
Maipalagip a ni Marizel Yukee ket sumangsango iti nagduduma a federal charges iti Estados Unidos kalpasan a naakusaran nga utek iti maysa a nalawa nga healthcare fraud scheme a maipagarup a nangluko iti Medicare ken TRICARE ti agarup US$1 bilyon wenno mapatta-patta a P51.6 bilyon.
Nakasoan daytoy ti conspiracy to commit healthcare fraud ken wire fraud, healthcare fraud, conspiracy to pay and receive illegal kickbacks ken money laundering.
Kabayatanna, inpakaammo ni Jagonap nga iti agdama ket makapaspasar ti United Kingdom ti heatwave wenno ti nakaro a kinabara ti panawen no sadinno a nangiyetnag dagiti otoridad ti red warning.
