LAOAG CITY – Maysa a Filipina nurse practitioner ti sumangsango iti nagduduma a federal charges iti Estados Unidos kalpasan a naakusaran nga utek iti maysa a nalawa nga healthcare fraud scheme a maipagarop a nangluko iti Medicare ken TRICARE ti agarop US$1 bilyon wenno mapatta-patta a P51.6 bilyon.
Nabigbig ti suspek a ni Marizel Yukee, residente ti Las Vegas, a naiyisoan ti warrant of arrest babaen ti United States District Court for the Southern District of Texas.
Nakasoan daytoy ti conspiracy to commit healthcare fraud ken wire fraud, healthcare fraud, conspiracy to pay and receive illegal kickbacks, ken money laundering.
Basar kadagiti federal prosecutor, maipagarop a ti target ti operasyon ket dagiti nataengan ken pasyente nga addaan ti nakaro a sakit iti babaen ti panangipaay ti saan a kasapulan a wound treatments, ken kalpasan na ket singsingiren da kadagiti government health programs.
Maikonkonektar ni Yukee iti operasyon ti uppat a wound-care clinics iti Texas, Nevada, California, ken Hawaii, no sadinno a maipagarop nga agbaybayad ti illegal a kickbacks kasukat ti patient referrals.
Basar ti imbestigasyon, maipagarop a mapekpeke ti medical records dagiti pasyente ken masingsingir para kadagiti serbisyo a saan met a kasapulan idinto a makaawat ti minilyon a dolyar a kickbacks.
Segun pay kadagiti prosecutors, maipagarop a nausar dagiti naala a kwarta iti luho ken nababalor a sanikua, karaman ti Ferrari supercar nga agbalor ti nasurok a US$500,000, dagiti alahas kas ti Bulgari necklace nga agbalor ti US$865,000, maysa a balay iti Hawaii a mapatta-patta nga agbalor ti US$1 million, ken maysa a beach resort project iti Santa Ana, Cagayan iti Pilipinas nga umabot iti US$4.6 million.
