LAOAG CITY – Natay ti maysa a lalaki idinto a nagsagaba ti ado a sugsugat ti live-in partner na kalpasan ti vehicular accident idiay Pasuquin, Ilocos Norte.
Daytoy ti kinumpirmaran ni Police Chief Inspector Roldan Suitos, ti chief of police idiay ili iti Pasuquin.
Binigbig ni Suitos ti natay a biktima a ni Moncris Stipuler, agtawen iti 31, taga Pandacan, Manila idinto a ti nasugsugatan a live-in partner na ket ni Rechelle Correa, agtawen iti 32, ken taga Baclaran Parañaque.
Inlawlawag ni Suitos a basar iti imbestigasyon da, bayat ti panagdaldalyasat dagiti biktima iti national highway iti paset ti Barangay Davila ket adda ti limmasat nga aso.
Gapu ti daytoy, liniklikan ni Stipuler isut gapuna a napan iti bangir a lane.
Nupay kasta, saanna a nakita ti sumungad nga Isuzu forward nga inturong ni Rodel Austria, agtawen iti 28, naasawaan ken residente idiay ili a Banna a nagresulta ti pannakadungpar ti dagiti biktima.
Segun ken ni Suitos, saan a malidawan dagiti sinagaba a sugsugat ni Stipuler ken naipasiruk pay daytoy iti truck idinto a ti live-in partner na ket nagpasar met ti sugat iti nagduduma a paset ti bagina.
