LAOAG CITY – Naipaayan a dagus ti tulong dagiti agtataraken ti baboy a naapektaran iti African Swine Fever wenno ASF iti maysa a sitio ti Brgy. Manalpac ti ili a Solsona.
Daytoy ket kalpasan a pinagtigna a dagus ni Gob. Matthew Marcos Manotoc ti Provincial Veterinary Office a mangkita no ania ti mabalin a maitulong ti gobierno probinsial kadagiti maseknan.
Segun ken ni Provincial Veterinarian Dr. Loida Valenzuela, naipaayan ti karnero manipud iti “livestock facility ti probinsia dagiti apektado iti ASF.
Inpalgak na a malaksid iti daytoy ket adda pay dagiti naited kadagiti nadakamat a kakailian a kalding, baka ken “free range chicken” a paset iti rollover project ti ili a Solsona.
Inbunannag na a saan nga agpatingga ditoy ti maipaay a tulong kadagiti maseknan.
Inbatad na a manarimaan ti panangiproseso ti opisina da kadagiti kasapulan a dokumento iti panagaplikar ti Quick Response Fund ti Departamento ti Agrikultura.
Innayon na nga iti agdama ket agtultuloy ti panangisaysayangkatda ti “post-culling control idiay Brgy. Manalpac.
Kabayatanna, manarimaan ti “culling” wenno pannakapapatay ken pannakaikali dagiti taraken a baboy idiay Brgy. Maananteng.
Daytoy ket kalpasan nga adda ti sabali pay a kaso ti ASF a naduktalan iti nadakamat a barangay.
Nupay kasta, kas idiay Brgy. Manalpac ket ikarigatan ti probinsia a maipaayan a dagus dagiti addaan ti taraken a baboy ti tulong a kas iti kalikagum ti gobernador.
