LAOAG CITY – Inbatad ti aktres a ni Lovi Poe nga ado dagiti nagbaliw iti biagna sipud nagkasar da iti asawa na a ni Monty Blencowe.
Inlawlawag na a sakbay a nagasawa ket ti laeng ammo ken adda ti panunot na ket ti agtrabaho gapu ta rinugyan na ti nagtrabaho idi agtawen ti 15.
Nupay kasta, kuna ni Lovi nga iti panagasawa na ket ado dagiti nasursuro ken nadiskubre na iti biag.
Karaman ditoyen ti rumbeng a panangbalanse ti trabaho ken ti personal a biag gapu ta saan a mabalin a nakatutuk laeng ti bagi ken panunot iti panagtrabaho.
Inarakurak ni Lovi a nautub na a masapol nga ilatangan ti oras ken panawen ti bagi tapno makapagrelax ken makalangen dagiti ipatpateg iti biag.
Innayon na a maysa pay a nadiskubre na iti panagasawa na ket ti kinalaing na nga agluto, banag a saanna a naar-aramid idi single pay daytoy.
