LAOAG CITY – Kalikagum ti maysa nga ama nga adda ti rangkap ti bagina a ni Sangguniang Panlungsod Member-Elect Eleuterio Salamangkit Jr. a residente ti Barangay Maipalig iti siudad ti Batac nga ilungalong ti patas a karebbengan.
Inyestoria ni Salamangkit Jr. dagiti kapadasan ken sakripisiona kas maysa nga ama nga adda ti rangkap ti bagina kagiddan ti pannakaselebrar ti Father’s Day ita nga aldaw.
Segun kenkuana, naipasngay daytoy nga innem laeng dagiti ramayna a nagbalin a dakkel a karit kenkuana nangruna kadagiti tattao a nauyaw ken managtagibassit.
Inbatadna nga idi ubing pay laeng daytoy ket kwinestionaranna no apay nga adda ti rangkap ti bagina agingga iti panagtulid ti panawen ket in-inot nga inawatna ti kasasaadna.
Inlawlawagna nga adda dagiti gundaway a saan daytoy a naipaayan ti equal opportunities wenno ti patas nga oportunidad gapu iti rangkap ti bagina.
Gapu iti daytoy, saanna a nailinged nga adda dagiti napasaranna a pannakailanglangi wenno saan a maipangpangruna kadagiti nagduduma a banag.
Nupay kasta, kunana a saan a nagbalin daytoy a tubeng tapno saan a magaw-at dagiti nangangato nga arapaapna iti baet ti kasasaadna.
Mainaig iti daytoy, inpakaammona a kurang man dagiti ramay dagiti imana ket addaan met daytoy ti kumpleto ken naragsak a pamilia nga isu ti pangal-alaanna ti pigsa ken kiredna iti inaldaw-aldaw.
Innayonna nga apaman a pormal daytoy nga agtugaw iti konseho ket insigida nga ilungalong ti patas a karebbengan dagiti umili ken masolbar dagiti kangrunaan a parikot dagiti residente.
Kabayatanna, naammoan a ni Sangguniang Panlungsod Member-Elect Salamangkit Jr. ket Certified Public Accountant ken agdama a Kapitan ti Barangay Maipalig iti siudad ti Batac.
