LAOAG CITY – Desido a mangipila ti kaso ni Mr. Wilmer Dela Cruz, ama ti nakabkabil nga officer ti Reserve Officers’ Training Corps iti Bacarra National Comprehensive High School iti ili ti Bacarra kontra kadagiti estudiante a nangdangran iti putotna.
Segun kenkuana, basar iti pannakisarsaritana iti barona apaman a mapan ag-training iti kapanagan kas maysa kadagiti opisial ti Reserve Officers’ Training Corps ket adda ti nakagiddanna nga estudiante a saanna nga am-ammo no sadino ket kinita met laeng dagitoy.
Nupay kasta, kunana nga idi agsubli iti klasrum ti barona ket dita a sinurot dagiti estudiante ken pinangtaanda isuna nga inton agawid ket kabilenda daytoy.
Inbatadna nga idi agawiden ti barona manipod iti nasao a pagadalan ket adda dagiti maseknan nga estudiante ti nangpadaanan iti barona ket ditoy nga immasideg ken dinanogna iti rupana usar ti landok nga iggemna.
Gapu iti daytoy, inlawlawagna a napukawan ti puot ti barona a nangitunda ti pannakatulidna iti kalsada gapu iti nakaro a panangdanogdanog dagiti estudiante kenkuana.
Kunana a nakapuot laengen ti barona nga addan iti uneg ti School Clinic ken nakitana a nagsagaba ti nakana a sugat ti anakna iti rupana.
Mainaig iti daytoy, kuna ni Mr. Dela Cruz nga apaman a napan iti Guidance Office iti nadakamat a pagadalan ket ditoy a naammoanna nga adda ti immun-unan a rekord dagiti maseknan nga estudiante.
Kunana a kalikagumna a mapaayaban dagiti maseknan nga estudiante nga adda iti likudan ti insidente tapno mapagsasaritaan ti nasao a napasamak ngem rumrummuar a saanen a sumsumrek dagitoy iti pagadalan gapu ta mabutbutengda.
Inpalgakna a no saan nga agpakita dagiti estudiente tapno sangoen ti inaramidda ket dagiti nagannak dagitoy ti mapaayaban a mapagsungbat iti daytoy nga insidente.
Innayonna nga iti agdama ket nagtalinaed pay laeng iti Governor Roque Ablan Senior Memorial Hospital ditoy siudad ti Laoag ti barona a manamnama a dumalan iti operasion a masapol ti 60 a ribu a pisos para iti naan-anay a pannakatamingna.
Kabayatanna, naammoan a naipadanon metten ti ama ti biktima iti Philippine National Police iti ili ti Bacarra ti napasamak nga insidente.
