LAOAG CITY – Inbatad ni Mr. Guiller Lopez, nagturpos a cumlaude iti kurso a Bachelors of Science and Development Communication iti Mariano Marcos State University (MMSU) a ti nagun-od na a pammadayaw ket saan laeng a para kenkuana no di ket para iti pamilya na.
Inlawlawag na nga idi nagenrol iti kolehiyo ket inmula na iti panunot na a masapol a no agturpos ket adda maawat na a pammadayaw wenno ag-cumlaude.
Inadmitir na nga adda ti pannaka-pressure na gapu iti target na nga agbalin a cumlaude iti panagturpos na ngem saan a simmuko no di ket nagbalin nga inspirasyon na ti pamilya na.
Inpakaammo ni Lopez a ti ina na ket OFW idiay Russia idinto a ti ama na ket construction worker.
Innayon na a gapu iti makitkita na a kinarigat ti panagbiag da ken ti panagsaksakripisyo dagiti nagannak da tapno maited da ti kasapulan da ket ad-adda pay nga ingaed na ti nagadal.
Kuna na a kalikagom na a maiyaon iti kinarigat ti pamilya na ken maikkan na dagitoy iti napintas a panagbiag.
Mainaig iti daytoy, inbalakad ni Lopez a no adda ti kayat a magun-od iti biag ket masapol a mangiset ti goal ken adda ti rason no apay a kasapulan nga aramiden ti maysa a banag.
