LAOAG CITY – Epektibo ti panangiyimplementar ti gobierno lokal ditoy ciudad ti Laoag babaen ti City Social Welfare and Development ti anti-medicant Law a kas solusyon ti kinaado dagiti agkaiwarang a badjao ditoy ciudad.
Daytoy ti nagbalin nga obserbasyon ni Mrs. Perlita Cabello, ti mangidadaulo iti City Social Welfare and Development ditoy ciudad ti Laoag.
Kuna na a sipud naiyimplementar ti nasao a linteg ket bimmasiten dagiti makitkita nga agkaiwarang a badjao ditoy ciudad.
Inbatad ni Cabello nga awan pay ti napatawan ti multa a badjao gapu ta kalpasan a mabagbagaan dagitoy a no maminduan a daras a matiliw da ket mamulta dan, ket saan dan nga agsubli pay.
Mamati ni Cabello a no agtultuloy ti ar-ramiden ti opisina da ket naan-anay ton a masolbar ti problema kadagiti badjao ken dagiti ubbing nga agpalpalama ditoy ciudad.
Maipalagip nga immunan a naidanon ti problema iti opisina ni Mayor James Bryan Alcid ken dagus met a nakitaripnong kadagiti nagduduma nga opisina ti gobierno kas Department of Social Welfare and Development, Philippine National Police, City Disaster Risk Reduction and Management Office ken dadduma pay tapno adaptaren ken iyimplementar ti anti-medicant law no sadinno a mapatawan ti multa dagiti agpalama ken dagiti agited ti palama ti 500 agingga iti P1,000 pesos wenno 2 agingga iti 4 a tawen a pannakaibalud.
