LAOAG CITY – Inikkat ti Brazil ti ambassador da iti Argentina kas protesta iti ibilang da a pananginsulto ni Argentine President Javier Milei ken ni Brazilian counterpart Luiz Inácio Lula da Silva, kabayatan ti ibibisita na iti Brazil.
Maipalagip nga iti panagsarita ni Milei iti naisayangkat a rally iti São Paulo para iti kampanya ni Flávio Bolsonaro, nga agpaidasig iti presidential election no sadinno a makalaban na ni Lula intono Oktubre ita a tawen.
Iti panagbitla ni Milei ket inawagan na ni Lula kas mannanakaw ken “convict”, no sadinno a ti dakdakamaten na ket ti pannakaibalud ti naud-udi iti kallabes sakbay a naibabawi ti pannaka-kunviktar na gapu iti kaso a panagkunniber ken nagballigi iti kina-presidente idi 2022.
Ni Milei ket napinget a kaalyado iti pulitika ni Flávio Bolsonaro, anak ti nabalud a dati a presidente ti Brazil a ni Jair Bolsonaro.
Nasentensyaan ni Jair Bolsonaro ti nasurok a 27 a tawen a pannakabalud gapu iti pananggandat na a nangipatungpal ti kudeta ken panagtalinaed na iti pwesto kalpasan a naabak idi 2022 election babaen ken ni Lula.
Naka-house arrest iti agdama ni Jair Bolsonaro ken naminpinsanen a napawilan nga agpaidasig iti aniaman a posisyon iti gobierno.
