LAOAG CITY – Nagpanawagan ni dati a Presidential Speaker Atty. Harry Roque iti publiko a makikaysa iti People Power tapno bumaba iti puesto ni Presidente Ferdinand Marcos Jr.
Maiyuswat ti People Power iti Forbes Park no sadinno nga agnanaed dagiti sumagmamano a pulitiko a karaman iti maanomalya a flood control projects.
Inbatad ni Roque nga husto laeng nga ikabil iti lugar dagiti kurakot a pulitiko ti rally tapno ad-adda a mariknada ti pungtot dagiti umili iti korapsion.
Inpetteng ni Atty. Roque a ti nasken a babalawen iti korapsion ket ni Presidente Marcos Jr. gapu ta isuna ti mangidadaulo ditoy pagilian.
Kunana a saan a maaramid nga agtakaw ti dakkel a kuarta iti gobierno da dati nga House Speaker Martin Romualdez ken dati a Cong. Zaldy Co no awan ti pammalubos ni Presidente Marcos.
Kabayatanna, inakusaran ni Roque dagiti Marcos a maipagarup nga us-usarenda ti gobierno ken ar-aramidenda a negosio tapno agpabaknang.
Innayonna nga inaramid daytoyen idi ni dati a Presidente Marcos Sr. ken intultuloy ita ti anakna a ni Marcos Jr. isu a rumbeng nga ibalud dagitoy ken saanen nga ipalubos pay a makasublida iti pulitika.
