LAOAG CITY – Natukkol ti akin kannigid a saka Australian National kalpasan a naidungpar ti nagluganan na a motorsiklo a Kawasaki Versys iti maysa a boom truck iti Brgy. Baruyen iti ili ti Bangui.
Nabigbig ti biktima a ni Rey Kenneth Choquenot y Eduard, agtawen ti 64, naasawaan, negosyante ken residente iti Poblacion 4 iti ili ti Pasuquin idinto a ti Fuso Boom Truck ket inturong ni Junard Calibo, agtawen ti 40, naasawaan ken Brgy. Pancian iti ili ti Pagudpud.
Basar ti imbestigasyon ti PNP Bangui, agpapaamianan ti biktima ken idi makadanun iti approach ti rangtay iti nasao a barangay ket naawanan ti kontrol ken nasapgud ti boom truck.
Gapu iti daytoy, natukkol ti akin kannigid a saka ti Australian National ken nagsagaba ti sumagmamano pay a sugat.
Naitaray ti biktima iti ospital ken agtultuloy ti imbestigasyon kalpasan ti road crash incident.
