LAOAG CITY – Inpasingked ni Sangguniang Panlalawigan Member Atty. Donald Nicolas, Chairman ti Committee on Games and Amusement nga awan ti maisaysayangkat nga electronic sabong wenno e-sabong ditoy probinsia.
Segun kenkuana, daytoy ket maibasar iti nagbalin a duktal ti Department of the Interior and Local Government ditoy probinsia nga idadauloan ni Mr. Gerald Gallardo, Ilocos Norte Police Provincial Office nga idadauloan ni Provincial Director PCol. Julius Suriben pakairamanan ti Philippine Amusement and Gaming Corporation wenno PAGCOR Representatives.
Immuna iti daytoy, kuna ni Atty. Nicolas a maysa pay kadagiti napagsasaritaanda kabayatan ti taripnongda kadagiti maseknan ket ti pannakaisayangkat ti Committee Hearing iti nagbaetan dagiti kristo ken dagiti cockpit arena operators.
Inlawlawagna a daytoy ket kalpasan nga arig ket napukawanen ti trabaho dagiti kristo iti cockpit arena gapu ta adda dagiti sumagmamano a galyera ditoy probinsia nga agus-usar ti betting machine nga imbes a dagiti kristo ti mapan mangala ti pusta dagiti maseknan.
Maipalagip nga agkidkiddaw ni Mr. Eduardo Arcanses ti Barangay 24 iti San Nicolas, dati a Presidente ti Kristo iti Galyera ken ni Gobernador Matthew Marcos Manotoc a maisubli ti tradisional a wagas ti panagpallot kadagiti galyeraan ditoy Ilocos Norte.
Kabayatanna, addan ti siyam a Cockpit Arena ditoy Ilocos Norte pakairamanan ditoy Siudad ti Laoag, San Nicolas, Solsona, Dingras, Vintar, Badoc, Banna, Nueva Era ken iti ili ti Pasuquin.
