LAOAG CITY – Binalakadan ni Senator Panfilo “Ping” Lacson dagiti otoridad a paigetan ti intelligence operations iti panagbiruk kadagiti high-profile fugitive tapno mapaalisto ti panangarestar da kadagitoy.
Segun ken ni Lacson, napateg a mapasayaat ti intelligence work ken koordinasyon dagiti law enforcement agency iti panagbiruk kadagiti prominente a personalidad nga agdama a birbiruken ti linteg, karaman ni Senador Ronald “Bato” dela Rosa, negosyante a ni Atong Ang, dati a Gen. Gerald Bantag ken ti dati a kongresista a ni Zaldy Co a maipagarop a karaman iti flood control scam ken mapapati nga adda idiay France.
Kuna na a masayang laeng ti resources ti gobyerno no awan ti umdas nga intelligence gathering sakbay a mangiyuswat ti operasyon kontra kadagiti pugante.
Kagiddan iti daytoy, binanatan met ni Lacson ti sumagmamano nga abogado gapu iti maipagarop a panagiwarwaras da ti saan nga usto nga impormasyon mainaig iti panangikompara da ti nagbalin a kaso na ken ti sitwasyon iti agdama ni Dela Rosa.
Inlawlawag ni senador Lacson nga agduma ti nagbalin a sitwasyon da gapu ta ti panaglemmeng na idi ket kas maysa a “fugitive from injustice” kalpasan ti maipagarop a panangpuntirya kenkuana ni dati a Presidente Gloria Macapagal Arroyo.
Inpetteng ni Lacson a ti panaglemmeng na ket naibasar iti maipatpatungpal a jurisprudence iti dayta a panawen, ngem nabaliwan ken nalimitaran ti sakupen na idi 2025.
Kabayatanna, inpaganetget ni Lacson a ni Dela Rosa ket sumangsango ti maysa a lehitimo nga arrest warrant manipod iti International Criminal Court (ICC) mainaig iti maipagarop a papel na iti war on drugs iti administrasyon ni dati a Presidente Rodrigo Duterte.
