LAOAG CITY – Inadmitir ni Ka-Lando ti maysa a dati a kameng ti New Peoples Army iti Cordillera Administrative Region nga awan ti napintas a kapadasanna idi na-recruit isuna a makikappeng iti makakannigid a grupo.
Segun kenkuana, agtawen daytoy iti 17 idi na-recruit isuna dagiti kameng ti New Peoples Army iti mismo pagbasbasaaanna idiay Manila.
Inbatadna nga apaman a simrek isuna iti makakannigid a grupo ket nagturongda kadagiti nagduduma a lugar kas ti Central Luzon, Cordillera Administrative Region ken Ilocos Region tapno mangallukoy ti dadduma pay a makikappeng kadakuada.
Inlawlawagna a dakkel ti panagbabawina gapu ta napukaw ti oportunidad a makaadal ken makaala ti nasayaat a trabaho.
Kunana a saanna a mailibak a kaadduan kadakuada ket agturturong kadagiti pagtaengan iti dis-oras ti rabii tapno agkiddaw ti taraon ken no awan ti maitedda kadakuada ket butbutngenda dagiti maseknan a residente.
Mainaig iti daytoy, inpalgakna a nadagsen ti riknana idi natay ti kabsatna kabayatan ti rinnupakda kontra kadagiti kameng ti Philippine Army.
Nupay kasta, kuna ni Ka-Lando a saan a dagus nagibbat ken timmalaw iti makakannigid a grupo gapu iti situasionna.
Kabayatanna, naiget a kinontra ni Ka-Lando ti maysa a dati a kameng ti New Peoples Army iti Cordillera Administrative Region ti panang-ambush kadagiti sumagmamano a miembro ti Infantry Batallion kabayatan ti panangipaayda ti relief goods kadagiti bitkima ti Bagyo idiay Albay.
