LAOAG CITY – Maysa a B-52 Stratofortress bomber ti United States Air Force ti nagsuek sumagmamano a minuto kalpasan a nag-flight manipud iti Edwards Air Force Base iti California.
Iti maysa a post iti social media platform nga X, inbatad ti base nga insigida a nagresponde dagiti emergency crew iti lugar ti insidente.
Saan pay a nalawag iti agdama no adda dagiti natay wenno nasugatan iti aksidente ken ti rason ti panagsuek ti eroplano.
Ti B-52 Stratofortress ket maysa a subsonic strategic bomber nga adda ti kabaelanna a mangipatulod ti nuclear weapon.
Naammoan a kabaelanna ti agikarga ti 70,000 a libra dagiti bomba ken dadduma pay nga armas a mapatta-patta nga agbalor ti sumurok-kumurang $110 milyon ti kada yunit ti nasao nga eroplano.
Iti maysa a video, makita a sebsebseban dagiti emergency responder ti apoy iti maysa a dakkel a paset ti runway a nauram kalpasan ti insidente.
Masarakan iti amianan ti Los Angeles ti Edwards Air Force Base nga am-ammo a pagtaengan ti kadakkelan nga airfield iti intero a lubong nga adda ti sumurok-kumurang 10,000 a miembro ti militar, kontratista ken sibilian nga empleado ti agtrabtrabaho iti nasao a pasilidad.
Agtultuloy ti imbestigasion dagiti otoridad tapno maammoan ti namunganayan ti panagsuek ti bomber.
