LAOAG CITY – Para iti kaaduan, ti biahe a sumrek iti trabaho ket tren, bus, jeep wenno kotse ngem para ken ni Racheal Kaur, maysa nga ina idiay Malaysia, eroplano ti “daily commute.”
Inaldaw a tumaytayab daytoy manipud iti Penang a agturong iti Kuala Lumpur tapno agtrabaho ket agawid iti rabii tapno makaduana dagiti annakna.
Agririing isuna iti 4:00 ti bigat gapu ta kasapulanna nga adda iti airport ti 5:00 ken tumayab iti 6:00.
Iti panagsangpet iti opisina iti oras ti 7:45, agtrabtrabaho isuna iti maysa nga aldaw sakbay nga aglugan manen iti eroplano nga agawid. Sakbay iti oras ti 8:00 ti rabii ket adda isunan iti pagtaenganda kaduana ti pamiliana.
Nalaklaka pay daytoy maidasig kadagiti gastona iti kasera ken taraon idi agnanaed isuna iti asideg iti pagtrabahoanna.
Gapu ta maysa isuna nga Assistant Manager iti Finance Department ti maysa nga airline, adda ti diskuentona iti plane ticket. Iti dati ket aggasgastos iti $474 iti kada bulan, ngem ita, bimmaba daytoy iti $316 laeng.
