LAOAG CITY – Nagun-od ti baro a world record ni Hilde Dosogne, agtawen ti 55 manipud idiay Belgium kalpasan a nagtaray ti 366 a full marathons iti uneg ti maysa a tawen.
Inaldaw-aldaw nga agtartaray ni Dosogne ti 42.195 kilometers aniaman ti sasaaden ti panawen tapno makumpleto ti monumental a karit.
Maidasig iti 42 a kilometro ti tartarayenna iti distansia manipud iti Cubao, Quezon City nga agturong iti Sta. Rosa, Laguna.
Iti baet ti physical ken mental challenges pakairamanan ti fatigue, joint inflammation ken sumagmamano a daras a pannakatakkleb ket nagtultuloy latta ni Dosogne.
Naminsan pay ket nagtaray isuna ti 69 a kilometro iti maysa nga aldaw kalpasan a bimmisita iti ospital tapno ipakita ti nasugatan a ramayna.
Iti pakabuklan, timmaray isuna ti 15 a ribu a kilometro idi 2024 nga agarup amin ket naiyuswat iti Watersportbaan, maysa a rowing complex idiay Ghent, Belgium.
Saan laeng daytoy a personal a balligi. Nakaukkon pay ni Dosogne ti sumurok €65,000 para iti BIG Against Breast Cancer, maysa nga organisasion a tumultulong kadagiti babbai nga addaan ti kanser.
