LAOAG CITY – Maysa a baro a kaipasngay nga endangered hippopotamus ti daydaywen ita dagiti tattao idiay Thailand.
Idi Hulio 10, 2024, naipasngay ti maysa a rare pigmy hippopotamus iti Khao Kheow Open Zoo idiay Chonburi, Thailand.
Gapu ta maibilang nga endangered ti klase daytoy nga hippopotamus, napagsasaritaan dagiti Thai netizens ti kaiyanak ken naaddaan pay ti online voting no ania ti agbalin a naganna.
Kalpasan ti panagbubutos, napagnunumoan dagiti netizens a naganan daytoy ti “Moo Deng” a maiyarngi iti nagan ti maysa a taraon idiay Thailand a ‘Bouncy Pork.’
Iti kinasikat ni Moo Deng, ti nakaul-ulimek a zoo ket nagbalin a tourist destination dagiti turista.
Basar iti mangimatmaton iti zoo, ti dati a ginasot a turista iti maysa nga aldaw ket nagbalin daytoyen a 7 a ribu agingga iti 10 a ribu a turista.
