LAOAG CITY – Inikkan ti Kamara de Representantes ti clearance ni Leyte 1st District Rep. Martin Romualdez tapno agbiahe iti Singapore basar iti abugadona.
Daytoy ket maisupadi iti immunan a rakurak ti Office of the Ombudsman a saan daytoy nga inaprobaran ti travel request ni Romualdez.
Inlawlawag ni Ombudsman Jesus Crispin Remulla a ni Romualdez ket adda iti babaen ti Immigration Lookout Bulletin Order kabayatan nga agtultuloy ti imbestigasion mainaig iti maipagarup a flood control scandal isut gapuna a saanda nga irekrekomendar ti panagtalawna ditoy pagilian ken inpettengna a nasaysayaat no ditoy Pilipinas laengen nga agpaagas.
Nupay kasta, inlawlawag ti abugado ni Romualdez a ni Atty. Ade Fajardo a saan daytoy a travel ban no diket simple a koordinasion laeng iti immigration ken inpaganetgetna a naikkanen ti travel authority ti agpanpanday linteg.
Iti maysa a video, kuna met ni Romualdez nga agbiahe isuna iti Singapore manipud Abril 20 agingga Mayo 4 para iti follow-up checkup kalpasan ti angioplasty ken inpasiguradona nga agsubli isuna iti pagilian ken agtalinaed a nakasagana para kadagiti responsibilidad iti Kongreso.
Kabayatanna, agkidkiddaw ti Office of the Ombudsman ti precautionary hold departure order kontra kenkuana mainaig iti imbestigasion iti maipagarup a ₱56-bilyon a flood control kickback scheme no sadinno a nadakamat isuna nga adda ti dakkel a posibilidad nga aglibas ken posible a karaman basar kadagiti testimonia ken affidavit ti sumagmamano a personalidad kas ken ni dati a Cong. Elizaldy Co ken dagiti testigo a sumango kadagiti panagdengngeg ti Senate Blue Ribbon Committee.
