LAOAG CITY – Adda ti nasurok a 19,000 dagiti public utility vehicles (PUV) iti intero a pagilian ti naituding a dumalan iti government service contracting program (SCP) intono bigat, aldaw ti Lunes, Abril 20.
Segun ken ni acting Transportation Secretary Giovanni Lopez, nakasagana ti Land Transportation Franchising and Regulatory Board (LTFRB) a tumulong kadagiti kuwalipikado a drivers ken operators iti babaen ti government service contracting program.
Karaman ditoy dagiti nagpalista iti babaen ti online registration.
Innayon pay ti opisyal a masapol nga iti uneg ti 24 oras ket on-board dan tapno makarugi da iti pannakipaset iti nasao a programa.
Gapu iti naimballigian nga information campaign ket naaddaan ti napintas nga improvement a ngimmato ti bilang dagiti nagpalista.
Iti babaen ti government service contracting program, ti gobierno ket mangipaay ti P30 ti kada kilometro a subsidya para iti jeepneys, P40 met iti kada kilometro para iti modern jeepneys ke P100 ti kada kilometro para iti buses.
Maibasar iti patta-patta ti Land Transportation Franchising and Regulatory Board, adda ti innem a biyahe iti uneg ti maysa nga aldaw EDSA carousel buses ken agingga iti 100 kilometers met iti kada aldaw para kadagiti buses, UV expresses ken jeepney.
Mamati ti opisyal a no ngumato ti bilang dagiti registrants ket ngumato met ti bilang dagiti pasahero a mabenepisyaran iti nasao a programa.
