LAOAG CITY – Nakita ti agtatapaw a bangkay ti maysa a lalaki iti karayan iti paset ti Barangay 37-A, Casilian iti ili ti Bacarra.
Basar ken ni Police Lt. Col Roldan Suitos, ti chief of police iti ili ti Bacarra, ti biktima ket ni Celso Saturnino, agtawen ti 45, naasawaan, mannalon ken residente metlaeng iti nadakamat a barangay.
Kuna na a basar iti imbestigasyon da, nakita ti agnagan Jojo Javier ti biktima kabayatan ti idadalyasat na iti lugar a mapan iti pagtrabahoan na.
Iti pannakaeksamen ti bangkay babaen ti Municipal Health Officer iti nasao nga ili ket nakumpirmaran a ti nakatayan ti biktima ket gapu iti pannakalmes ken awan ti nakita a foul play iti napasamak.
Inpakaammo pay ni Suitos a basar iti imbestigasyon da ket immuna a napan nakiinom ti biktima, ken possible nga idi agawid ket natnag iti karayan a nangitunda ti pannakalmes na.
Innayon na nga inlungalong da ti pannakaipadalan ti otopsiya ti bangkay ngem saanen nga immanamong ti pamilya ti biktima gapu ta patien da nga awan ti foul play iti pannakatay na.
