LAOAG CITY – Naiyawiden ti bangkay ti maysa nga overseas Filipino worker kalpasan a pimmusay gapu ti pannakauram ti paset ti condominium idiay Qatar idi Marso 30, 2020.
Segun kenni Mr. Leonardo Manzano, ama ti biktima a ni Maricris Manzano, residente iti Brgy. Tabug iti siudad ti Batac, naiyawid ti bangkay ti anak na babaen ti tulong ti lokal a gobyerno iti siudad ti Batac, iti gobyerno probinsyal ken dagiti maseknan nga ahensya.
Inbatad na a naamuan na kadagiti kakadua ti anak na a nakalasat iti uram a namunganay ti insidente kalpasan nga adda ti maipagarup a pimmutok a charger ti cellphone iti maikadua a kadsaaran ti condominium.
Inlawlawag ni Manzano nga adda iti maikatlo a kadsaaran ti condominium ti anak na idi mapasamak ti uram ket saanen a nakalasat agraman dagiti dua a Pilipina ken maysa nga Sri Lankan.
Kuna ni Mr. Manzano a no malpas ti panagtrabaho ti anak na kas OFW ket kalikagum na a makadenna ti asawa na ken mangbukel ti pamilya.
Addan ti naipondar ti anak na a pagtaengan iti ili ti San Nicolas nga isu ti pagiyanan da kuma nga agassawa.
Naamuan nga uppat a tawen ti panagtrabaho ti biktima idiay Qatar.
Napalaos ti panagladingit ti pamilya Manzano, dagiti kabagyan da ken gagayem da gapu iti saan a napakpakadaan nga ipupusay ni Mrs. Maricris Manzano bayat nga adda idiay Qatar.
Kabayatanna, inpakaammo ni Mr. Jomar Dadiz ti asawa ti biktima nga OFW a ni Maricris Manzano, a nagparikna ti asawa na idi pimmusay.
Kuna na nga iti panagparikna ti asawa na ket babaen iti tagtagainep a panangikaammo na a pimmusayen ken naiturposen iti motorsiklo nga installment.
Inbatad ni Dadiz a kalpasan a natagtagainep na ti asawa na ket napan pay laeng nagpagna-pagna iti taltalon.
Nabasa laengen ni Dadiz ti mensahe iti cellphone a nangipakaammo kenkuana a pimmusay ti asawa na nga adda idiay Qatar.
Saan paylaeng a maawat ti pamilya seknan ti ipupusay ti OFW ken nakaimansayag iti nasao a barangay iti agdama.
