LAOAG CITY – Nangiparuk-at ti red tide warning dagiti health ken fisheries authorities iti sumagmamano a paset ti Samar ken kaparanget a kabayabayan kalpasan a nagpositibo iti saxitoxin ti seawater ken shellfish samples, maysa a sabidong a mabalin a mangitunda ti paralytic shellfish poisoning.
Basar iti advisory ti regional office ti Bureau of Fisheries and Aquatic Resources (BFAR), nagpositibo iti Pyrodinium bahamense ti seawater samples manipud iti Irong-Irong Bay idiay Samar, maysa a klase ti toxic marine dinoflagellate a mangitunda ti harmful algal bloom wenno ad-adda nga am-ammo iti awag a red tide.
Mapaspasamak ti red tide no alisto nga umadu ti microscopic algae iti coastal waters ken agar-aramid ti sabidong a maur-urnong iti shellfish kas ti tahong, talaba, tulya ken armang.
No nakapangan ti kontaminado a shellfish, mabalin daytoy a mangitunda ti nakaro a sakit wenno pannakatay.
Nangipatungpal metten dagiti otoridad ti shellfish ban kadagiti sumagmamano a lugar kalpasan a nagpositibo iti saxitoxin ti shellfish meat samples.
Karaman kadagiti naapektaran a lugar ti Biliran Island, Daram idiay Samar ken Matarinao Bay idiay Eastern Samar a sakupen kadagiti ili ti General MacArthur, Quinapondan, Hernani ken Salcedo.
