LAOAG CITY – Nagballaag ti Bangko Sentral ng Pilipinas (BSP) iti publiko kontra kadagiti indibidual nga agpampammarang kas opisial wenno miembro ti ahensia tapno agkiddaw ti donasion wenno mangala ti personal nga impormasion.
Inlawlawag ti Bangko Sentral ng Pilipinas a saan pulos daytoy a dumawdawat iti donasion wenno aniaman a klase ti kontribusion pinansial manipud iti publiko.
Inallukoy ti central bank ti publiko nga agbalin a naannad ken iberipikar ti panagbalin a pudno ti aniaman a komunikasion wenno dokumento a maipagarup manipud iti Bangko Sentral ng Pilipinas.
Binalakadan pay ti Bangko Sentral ng Pilipinas ti publiko nga insigida nga i-report kadagiti otoridad ti aniaman a mapagat-atapan wenno ilegal nga aktibidad tapno insigida daytoy a maimbestigaran.
