LAOAG CITY – Inpannakkel ni Gob. Matthew Marcos Manotoc a napili ti baro a Ferdinand Edralin Marcos Memorial Stadium kas “Special Mention Nominee” ti Architizer A+ Awards 2023.
Nakaragragsak ti gobernador iti panagbalin ti Marcos Stadium a maysa kadagiti naiget a banbantayanna a proyekto a “nominee” iti nadakamat a prestihioso a pammadayaw.
Naammoan a ti nadakamat a pammadayaw ket maipapaay a kas pammigbig iti architecture wenno design firm manipud iti nadumaduma a paset ti lubong a mangipamatmat iti naidumduma a “cultural typology”.
Malaksid iti pilien dagiti hurado a maipaayan ti pammadayaw ket adda met ti maited a gundaway iti publiko a mangpili iti kalikagum dagitoy a mangabak babaen iti Architizer A+ Popular Choice Award.
Naituding nga agngudo ti maisaysayangkat a panagbutos ti publiko agingga intono tengnga ti rabii ti Mayo dose ken mairakurak dagiti mapadayawan iti masungad a bulan ti Hunio.
Nupay kasta, para iti gobernador, dakkelen a pakaidayawan ti Ilocos Norte ti pannakainuminar ti nadakamat a proyekto iti nasao a pammadayaw.
