LAOAG CITY – Maysa a baro a klase ti uleg nga addaan ti natitirad a ngipen ti naduktalan iti Western Himalayas ti naipanagan iti aktor a ni Leonardo DiCaprio kas pammigbig iti adbokasia iti aglawlaw.
Ti Anguiculus dicaprioi wenno “DiCaprio’s Himalayan snake,” ket addaan ti naidumduma a klase kas ti dadakkel ti abot ti agongna, addaan ti adu a ngipen ken agmaris ti tanso ti kaliskisna nga arig addaan ti “collar” nga agmaris ti dapo iti tengngedna.
Ti nasao nga uleg nga addaan ti kaatiddog a 22 a pulgada ket naduktalan idi 2020 idiay Nepal ken Himachal Pradesh, India.
Naduktalan a kabaelanna ti mabiag iti nangato nga altitude.
Ti nasao a nagan ket kas panangsaludar iti aktibo a kampania ni DiCaprio kontra iti global climate change ken biodiversity loss a rinugianna idi agtutubo pay laeng isuna.
