LAOAG CITY – Nakapagsapatan dagiti nagduduma a naelektaran nga opisyal ditoy probinsya babaen kenni Associate Justice Diosdado M. Peralta a naiyuswat idiay ciudad ti Batac ita nga aldaw, Hunyo 29.
Iti panagbitla ni Governor-elect Matthew Marcos Manotoc, linagip na ti legacy ken ipadanon na ti panangapresyar na kadagiti umun-unan nga Ilokano leaders a nagserbi ditoy probinsya.
Inpasigurado ni Manotoc a dagiti naubraan ti ina na a ni Senator-elect Imee Marcos ket maitultuloy babaen ti liderato na para iti agtultuloy a panagdur-as ti probinsya.
Inpetteng na nga itultuloy na nga idanon dagiti kasapulan a serbisyo dagiti kaprobinsyaan..
Karaman kadagiti nagatendar ket ti ama na a ni Tomas Manotoc wenno mabigbigbig kas Coach Tommy, dati a Senador Bongbong Marcos, dati a frist Lady Imelda Marcos, DPWH Sec. Mark Villar ken dadduma pay a personalidad.
Ummuna iti daytoy, inadulwan ni Archbishop Emeritus Orlando Cardinal Quevedo ti misa a nakipagpasetan met laeng dagiti amin nga opisyal.
Naiget met ti seguridad nga inpaay dagiti amin a kameng ti pulisya ditoy Ilocos Norte para iti linak ken talna kabayatan ti naiysuwat a programa.
Kabayatanna, Nagyaman ni Senator-elect Imee Marcos kadagiti amin a simmuporta kadakuada iti napalabas nga eleksyon.
Segun kenni Marcos, ti panangabak da ket balligi ti amin nangruna ditoy Ilocos Norte.
Inpanamnama ni Marcos nga awan ti mailanglangi no diket agkukuyog amin para iti panagdur-as manipud iti kinarigat.
Inlawlawag na a saan kuma a panunuten ti publiko nga inbati na dagiti Ilokano gapo ta saan nan to a maaramid daytoy, ken inpasigurado na nga adda latta isuna kangrunaan no adda dagiti okasyon ditoy probinsya.
Inawis na pay dagiti maseknan nga agpasyar idiay Senado gapo ta kasapulan na ti kadwa tapno saan a maluksaw.
