LAOAG CITY – Inpasigurado ti Malacañang a mabayadan ti personal a kuarta nga inruar ni Baguio City Mayor Benjamin Magalong idi miembro pay laeng daytoy ti Independent Commission for Infrastructure (ICI).
Daytoy ti rakurak ni Palace Press Officer Undersecretary Claire Castro kalpasan a dinakamat ni Magalong a dumanon iti ₱30,000 ti inruarna a kuarta kabayatan ti kaaddana idi iti Independent Commission for Infrastructure.
Inbatad ni Castro, nakasaganan ti ₱41 milyon a pundo ti Independent Commission for Infrastructure isu nga aniaman a bayadan ket nasken nga insigida nga urnosen.
Inlawlawagna a saan a nagkurang ti Presidente ken inpaayna ti amin a suporta a kasapulan ti komision.
Kabayatanna, kuna met ti Palasyo a saan nga ikkaten ken agtalinaed ti Independent Commission for Infrastructure iti baet ti panagikkat dagiti sumagmamano a miembro nga immuna a dinutokan ni Presidente Marcos.
