LAOAG CITY – Sinuportaran ni Bicol Saro Partylist Representative Brian Raymund Yamsuan ti panawagan ti Bureau of Jail Management and Penology (BJMP) tapno ipangato ti food and medical allowance dagiti persons deprived of liberty (PDLs) iti babaen ti gakat a 2025 national budget.
Inbatad ni Yamsuan ti agdama a P70 daily budget iti taraon ken P15 iti kada aldaw a medical allowance iti tunggal balud iti babaen ti panangtaripato ti Bureau of Jail Management and Penology ket saan nga umdas tapno mapagtalinaed ti nutritional and health requirements.
Iti naiyuswat a budget deliberations ti House Committee on Appropriations para iti Bureau of Jail Management and Penology’s proposed 2025 budget, kiniddaw ni Jail Director Ruel Rivera nga ipangato ti food allowance iti P100 iti kada aldaw ken ti agas ket P30 iti kada aldaw met para iti agas.
Inpetteng ni Yamsuan nga awanen ti nutrision a maal-ala dagiti balud iti inaldaw-aldaw a taraonda ken ti medical allowance-da.
Malaksid ken ni Yamsuan, suportado met ti Commission on Human Rights (CHR), ti kiddaw ti Bureau of Jail Management and Penology nga ipangato ti food and medical allowance para kadagiti balud.
Kunana a ti nangdegdeg iti benneg ti salun-at dagiti balud ti nakaro a congestion kadagiti pagbaludan, kinakurang dagiti health professionals ken ti P15 per day medical allowance.
Basar iti datos ti BJMP, addaanda laeng ti 16 medical officers ken tallo a psychiatrists tapno mangipaay ti health care services kadagiti balud.
Ilunglungalong ni Yamsuan ti gakat nga House Bill 8672 a gagem nga i-unify ti fragmented correctional system nga ipadalan iti maymaysa a department ti Bureau of Jail Management and Penology iti Departent of the Interior and Local Government ken ti correctional and jail services kadagiti provincial governments ken ti Bureau of Corrections (BuCor), Board of Pardons and Parole (BPP); ken ti Parole and Probation Administration (PPA) a manarimaan nga adda iti babaen ti Department of Justice.
