LAOAG CITY – Manamnama a ngumato ti presio ti petrolio inton bigat, Hulio 21, no sadinno a maapektaran dagiti motorista.
Basar iti garaw ti global oil market, manamnama a ngumato ti presio ti diesel ti P10 agingga P11 kada litro, gasolina ngumato ti P3 agingga P4 kada litro ken kerosene ngumato met ti P11 agingga P12 kada litro.
Daytoy ket gapu iti agtultuloy a rinnupak ti baet ti Estados Unidos ken Iran.
Gapu iti daytoy, naobserbaran ita a lawas dagiti motorista kadagiti gasolinaan iti Quezon City a nasapa a nagpakarga ti gasolina ken diesel sakbay ti dakkel a panagngato ti presio ti petrolio inton Hulio 20.
Segun kadagiti dadduma a motorist, nasaysayaat laengen nga ag-commute-da imbes nga usaren dagiti luganda gapu iti surok a doble a presio ti petrolio.
Karaman pay ti maapektaran ket ti transportasion ti nateng iti nagduduma a merkado ti Metro Manila no sadinno mapilitanda nga ipangato iti presio dagiti lakoda tapno maisubli ti nayon ti gastosda.
Basar ti Department of Trade and Industry (DTI), saan pay nga insigida a ti panagngato ti presio ti kangrunaan a magatang gapu ta awan pay ti manufacturer a nangisagana ti price adjustment para kadagiti kangrunaan a produkto.
Kabayatanna, manamnama nga ianunsio ti Department of Energy (DOE) ti opisial a fuel price adjustment kadagiti sumaruno nga aldaw kageddan ti agtultuloy nga state of national energy emergency ti pagilian.
