LAOAG CITY – Nagtalinaed pay laeng iti Mariano Marcos Memorial Hospital and Medical Center idiay ciudad ti Batac ti biktima ti pammaltog idiay Barangay Nagbalagan iti ili ti Bangui.
Nabigbig daytoy a ni Alexander Respicio y Lagundino, agtawen ti 52, naasawaan idinto a ti suspek ket ni Christopher Garvida y Abenir, agpada a residente iti nasao a barangay.
Basar iti imbestigasyon ti PNP-Bangui, aggi-inom ti biktima ken suspek kadwa da ni Pacifico Aleta, Flor Nacapuy ken Denis Padron.
Nupay kasta, iti katengaan ti panaggii-inom da ket nairiing ti dati a susik ti suspek ken ti biktima a nangitunda ti panagdinnanog da.
Naamoan a kabayatan ti panaggabo dagiti dua ket binunot ti suspek ti paltog na ken pinaltogan na ti biktima a nakasugatan ti akin-kannigid a buksit na.
Dagus a naitaray iti ospital ti biktima ngem naiyakar iti ospital idiay ciudad ti Batac.
Rumrumwar a ti nausar a paltog ket 9MM.
Agpapan maisursurat ti damag ket manarimaan pay laeng ti manhunt operation dagiti kameng ti pulisya iti nasao nga ili tapno matiliw ti naglibas a suspek.
