LAOAG CITY – Manamnama ti pannakaipatungpal ti nagduduma a programa iti benneg iti salun-at ditoy ciudad ti Laoag.
Daytoy ket kalpasan iti panagsasarita da Mayor James Bryan Alcid, dati a Department of Health (DOH) Undersecretary Dr. Rosario Vergerie a nangibagi iti maysa a pribado a kompania, Department of Health Regional Director Paula Paz Sydiangco, ken ni City Health Officer Dr. Rodrigo Catcatan.
Segun kenni Dr. Catcatan, mangidadaulo ti City Health Office ditoy ciudad ti Laoag, a karaman kadagiti programa ti Philippine Health Insurance Corporation (Philhealth) a manamnama a maipatungpal ket ti Guaranteed and Accessible Medications for Outpatient Treatment (GAMOT) ken Yaman ng Kalusugan (YAKAP).
Kunana nga awan ti bayadan gapu ta ibaklay ti Philhealth ken umdas ti agas manipud kadagiti partner a pharmaceutical companies.
Innayon na a gagem ni Mayor Alcid nga ad-adda pay a maipalawa ti programa ti salun-at ditoy ciudad a dakkel a tulong kadagiti Laoageño.
