LAOAG CITY – Patien ni Mr. Victor Dabalos, mangidadaulo ti Provincial Environment and Natural Resources Office (PENRO) a babaen iti epektibo a programa ti opisina ket bumasbassiten dagiti madukduktalan nga agpukpukan ti kaykayo kadagiti kabanbanatayan.
Kunana a nu ikumpara iti naglabas a tawtawen, manmano laengen dagiti mairepreport nga illegal nga aktibidad iti kabanbantayan.
Mainaig iti daytoy, kinomendaran na ti nainget a panagbantay dagiti forest ranger ken lawin patrol.
Innayonna nga iti kada lawas ket adda pay iti maisaysayangkat a information campaign kadagiti lugar nga asideg ti banbantay tapno idanon dagiti impormasyon nu ana iti rumbeng nga aramiden ken liklikan dagitoy.
Kabayatanna, kuna pay ni Dabalos nga agsagsagana da itan para iti fire season month rason nga agtultuloy ti panagmula da iti kaykayo wenno iti reforestation.
Dakkel a tulong kunana ti pananggundaway da ti tiempo ti panagtutudo iti panagmula da iti kayo kada bukel iti bantay, ken kunana nga awan sarday ti koordinasyon da kadagiti lokal a gobierno tapno itandudo ti greening program iti bukod da a lugar.
