LAOAG CITY – Naiget a naglikudan ni Vice Mayor Rommel Labasan iti Pinili, Ilocos Norte ti alegasyon kenkuana a maipagarop a nangtungpa-tungpa ti maysa a Person with Disability (PWD).
Iti eksklusibo nga interview ti Bombo Radyo Laoag ken ni Vice Mayor Labasan, inlawlawag na nga iti panagturong da ti maysa a minatayan ket nadanun da ti maitudtudo a biktima a ni Ma-eng Abrojena.
Kuna na a ditoy a naamoan na a tallon nga aldaw iti minatayan ken maipagarop nga agin-inom lattan ti ubrana.
Malaksid ti daytoy, maipagarop a mangkurkuriro pay ni Abrojena isut gapu na a binagbagaan da a mapan maturogen gapu ta saanna nga ammo ti ar-aramiden na.
Gapu ta saan nga agawid ken dumngeg ni Abrojena ket sinagid na ti rupa na ngem saanna a gandat a dangran no di ket paset laeng ti panangisakit na.
Inpasingked ni Labasan a nasinged ken napateg kenkuana ni Abrojena gapu ta maysa daytoy a pagayam na isut gapu na a saanna a kabaelan a dangran nangruna ken maysa daytoy a PWD.
Inpetteng ti bise mayor nga umasideg manen ti eleksyon isut gapuna nga adda manen dagiti rumuar nga isyu kontra kenkuana.
