LAOAG CITY – Selebraran ita nga Hulio 6, 2026 ti Bombo Radyo Philippines ti naisangsangayan a maika-60 nga anibersario daytoy—innem a dekada nga awan sarday a panangserbi kadagiti Pilipino iti babaen ti napudno, alisto, ken mapagtalkan a panagipadamag.
Sipud naestablisar idi Hulio 6, 1966 ti visionary founder a ni Don Marcelino M. Florete Sr. ken ita iti panangidaulo ni Dr. Rogelio M. Florete, Chairman ti Bombo Radyo Philippines, dimmur-as ti Bombo Radyo manipud iti maysa nga istasion a nagbalin a natibker ken mapagtalkan a radio network iti pagilian.
Iti agdama, addaan daytoy ti 32 a digitalized nga AM ken FM stations iti 25 a kangrunaan a lugar iti intero a Pilipinas.
Iti uneg ti innem a dekada, nagbalin a napateg a paset ti biag ti minilyon a Pilipino ti Bombo Radyo.
Iti panawen ti kalamidad, eleksion, nailian a krisis, ken dagiti panagselebrar, nagtalinaed daytoy a kangruaan pangunahing a paggapgapoan ti damag, impormasion, komentario, ken serbisio publiko.
Nasursurok pay ngem broadcasting, agtultuloy ti panangilungalong ti network dagiti programa a mangipapaay ti direkta a serbisio kadagiti umili kas ti Bombo MEDICO- ti medical, dental and optical program, DUGONG BOMBO- ti nationwide blood letting campaign, ken BOMBO MUSIC FESTIVAL a mangitantandudo ti Original Pilipino Music.
Binigbig pay dagiti nagduduma nga institusion ti Bombo Radyo Philippines gapu iti kinalaing daytoy iti panagipadamag. Karaman ditoy ti pannakabigbig ti Bombo Network News kas Best News Program ti Catholic Mass Media Awards idi 2024 ken 2025, pakairamanan ti pannakabigbig kas Radio Network of the Year ti Rotary Club of Manila iti 2026 Pro Patria Journalism Awards.
Iti panangselebrar ti maika-60 nga anibersario, naminsan manen a pinatibker ti Bombo Radyo Philippines ti kari daytoy nga agtalinaed a numero uno ken mapagtalkan a pangalaan ti damag ken impormasyion—agtultuloy a mangitantandudo ti balanse a komentario, patas a panagipadamag, ken napateg a serbisio publiko para iti tunggal Pilipino.
Iti uneg ti 60 a tawen, maymaysa a nagan ti agtaltalinaed a kadua dagiti umili—Bombo Radyo Philippines. Maysa a nagan a pammaneknek a nagbalin nga A Way of Life for Filipinos.
