LAOAG CITY – Naiget ti koordinasion ti Business Permit and Licensing Office ken Philippine National Police ditoy ciudad ti Laoag iti panagmonitor kadagiti paggasolinaan iti ciudad.
Daytoy ti inbatad ni Atty. Charito Malicad, ti mangidadaulo iti Business Permit and Licensing Office ditoy ciudad ti Laoag.
Kunana nga itay laeng napalabas a lawas ket ininspeksyon da dagiti nagduduma a paggasolinaan ditoy ciudad tapno masigurado nga awan iti mapasamak nga hoarding kangrunaan ti pannakaabuso ti panagnayun ti presio dagiti produkto a petrolyo.
Mainaig iti daytoy, kuna ni Malicad a kabayatan iti panagispeksyon da ket awan met dagiti nakita da a naglabsing wenno problema kadagiti gas stations ditoy ciudad ti Laoag.
Innayon na nga iyur-uray da manen ti pakaammo ti Philippine National Police no mangiwayat da manen ti panaginspeksion kadagiti gas stations ita a lawas.
Kabayatanna, nagpalagip ni Malicad kadagiti paggasolinaan a saan nga ag-overpricing tapno maliklikan iti ania man a maipataw a pannausa kadakuada.
