LAOAG CITY – Inlawlawag ni Mrs. Evelyn Tanagon, Bangko Sentral ng Pilipinas (BSP) ditoy Ilocos Norte a ti mailaklako iti online a “brilliant uncirculated 20-piso” coin ket saan a “rare” ken karaman met laeng kadagiti inparuk-at ti BSP.
Segun kenni Tanagon, dagiti mailaklako iti online ket isu met laeng iti 20-peso coin nga inparuk-at ti BSP ken 20 a pisos met laeng ti balor daytoy ken saan a nanginngina pay.
Kunana a nupay saan na pay a mismo nakita wenno naiggaman iti maibagbaga a mailaklako iti online ket patien na karaman met laeng daytoy kadagiti kwarta manipud iti BSP ken awan ti nagdumaan na.
Inbatad na a no adda ti mapaneknekan nga aglaklako wenno agar-aramid ti aktibidad a maikontra iti pagalagadan iti BSP, adda ti Investigation Committee nga isu ti mangiproseso ti kaso a mabalin a sangwen ti maseknan.
Inpetteng na a basar iti RA 7563, ti kwarta ket mausar a pagbayad ken paggatang saan ket a pamastrekan wenno pagkwartaan.
Kabayatanna, kuna ni Tanagon a nasken nga usaren ti kwarta iti umiso a wagas.
Rakurak na daytoy kalpasan nga adon dagiti agraira a sabali a wagas a pannakakupin dagiti banknote a mabalin nga isu ti pakaperdian dagiti kwarta.
Kunana a gapo iti daytoy ket malabsing ti Presidential Decree 247 wenno Anti Mutulation Law nga addaan ti multa nga agarop 20 a ribo a pisos wenno pannakaibalod ti saan a bumaba iti lima a tawen.
