LAOAG CITY – Kwinestionaran ti sumagmamano a kritiko ti dakkel a pundo nga inlatang ti Department of Health (DOH) para iti panangipatulod ti 14 a delegado iti 78th World Health Assembly idiay Geneva, Switzerland manipud Mayo 15 agingga 25, 2026 nga umabot ti sumurok P5 milyon.
Basar iti report, baklayen ti gobierno ti amin a gastosen iti biahe pakairamanan ti pre-departure expenses ken round-trip airfare dagiti opisial.
Karaman kadagiti nadutokan a delegado da Undersecretaries Albert Francis Domingo ken Gloria Balboa; Assistant Secretaries Mylene Beltran ken Maria Kristina May Marasigan ken sumagmamano a doktor.
Ti pannakagastos iti nasao a biahe ket nakaala ti nagduduma a reaksion manipud iti sumagmamano a sektor partikular kadagiti mapaspasamak a problema iti pampubliko a salun-at iti pagilian kas ti kinakurang kadagiti agas, bakuna, katre iti ospital ken bilang dagiti health workers.
