LAOAG CITY – Balligi ti naiyuswat a drug buybust operation iti Barangay 7B ditoy ciudad ti Laoag.
Nabigbig ti subject ti operasyon a ni Marvin Paul Sampayan, agtawen ti 26, addaan ti live in partner maysa a buko vendor, tubo iti Barangay 34-B Gabu ngem agnanaed iti Barangay 7B ditoy ciudad.
Iti nasao nga operasyon, nagatang ti police pusuer buyer ti maysa a sachet ti maipagarop a shabu nga agbalor ti sangaribo a pisos, ken iti pannakakapkap daytoy ket naala ti maysa a kaha ti sigarilyo a naglaon ti innem a sachet ti maatap a shabu, ken maysa a kalibre 38 paltog nga addaan ti tallo a bala.
Segun met kenni Sampayan, saan a naglako ken naudi a nagusar ti iligal a droga idi 2012 ken inpetteng na a mapaneknekan na daytoy babaen iti pannakaipadalan na iti drug test.
Inlawlawag na nga agturong kuma iti Barangay Buttong ditoy ciudad nga isu ti ayan dagiti kariton a mausar para iti panaglako na ti buko.
Ni Sampayan ket maibilang nga Street level iti drug watchlist ti PNP-Laoag.
Naamoan a ni Sampayan ket naibalod iti Bilibid Prison idi 2015 gapo iti kaso na a child abuse ken idi Setyembre 4 ita a tawen ket rimuar manipud iti pagbalodan.
Basar met iti PNP, ni Sampayan ti maipagarop a pakaipatulodan dagiti iligal a droga nga aggapo iti Metro Manila ken daytoy ti mangiwaras kadagiti kakadua na a drug personalities.
