LAOAG CITY – Inbatad ni Mrs. Gina Factor iti Piddig, Ilocos Norte a saanda a mailadawan iti asawa na ti kinaragsak da iti panagturpos ti kakaisuna nga anak da a babai iti Philippine Military Academy (PMA) idiay Baguio City.
Iti baet ti marikrikna da a ragsak ket masayangan da gapu ta saanda a napan nakaatendar iti graduation ti anak da gapu iti mapaspasaran a krisis a gubuay ti covid-19.
Nagturpos ti anak da a ni Cadet 1st Class June Giel Anne Factor a Top 8 iti PMA Masidlawin Class of 2020.
Inadmitir ni Mrs. Factor a ti kayat na idi nga alaen a kurso ti anak na ket medisina isut gapuna nga immuna a nagenrol iti SLU iti kurso a BS Bio, ngem nakapanunot a napan nageksamen iti PMA ket nakapasa daytoy.
Inbaga na a binalakadan da idi ti anak na a saan lattan a sumsumrek gapu ta isu ti nagturpusan ti inauna a kabsat na a lalaki ken kasta met ti ama na.
Innayon ni Mrs. Factor nga inpalagip na pay iti anak na no kasanu ti karigat ti biag ti maysa a soldado, ngem mabalin nga isu ti arapaap na isut gapuna nga intuloy na latta ti simrek iti PMA.
Inistorya pay ni Mrs. Factor a nakaad-ado ti pannubok a nagpasaran ti anak na iti PMA isut gapuna a kanayun na a balakadan daytoy idi a no saannan a kabaelan ket agawiden, ngem pursigido ti anak na a mangileppas ti narugyan na.
Mainaig iti daytoy, kuna ni Mrs. Factor nga uray ti inauna nga anak na nga immunan a nagturpos iti PMA ket ti kayat da nga alaen na idi a kurso ket BS Nursing.
Kabayatanna, binalakadan ni Mrs. Factor dagiti pada na a nagannak a no aniaman ti kayat dagiti annak ket saan koma nga upayen no di ket ited ti sibubukel a suporta kadakuada.
