LAOAG CITY – Umabot iti 1,378 a mannalon (basic farm machinery operators ken 243 a mangngalap (motorized banca operators) ti nakaawat ti pinansyal a tulong a paggatang da ti krudo ken gasolina ditoy ciudad ti Laoag.
Daytoy ti inpakaammo ni Engr. Shiela Opelac, ti mangidadaulo iti City Agriculture Office ditoy ciudad.
Segun kenni Opelac, ti nasao nga addang ket inisyatibo ni Mayor James Bryan Alcid tapno agtultuloy iti panagtalon ken panagkalap dagiti maseknan, ken masigurado nga adda latta ti taraon ditoy ciudad ti Laoag.
Inpasingked ni Opelac nga agtultuloy ti pannakaipaay ti tulong kadagiti mannalon ken mangngalap gapu ta isuda ti maysa kadagiti kangrunaan nga apektado iti panagngato ti presyo dagiti produkto a petrolyo.
Nupay kasta, inlawlawag ni Opelac a dagiti naikkan iti fuel subsidy ket dagiti laeng agop-operar iti machinery para kadagiti mannalon, ken motorized banca para kadagiti mangngalap.
