LAOAG CITY – Sinegundaan ti City Environment and Natural Resources ti nagbalin a panawagan ti Department of Environment and Natural Resources iti publiko a liklikan ti panagikabil ti christmas lights kadagiti kayo.
Segun kenni Ms. Mylene Pascual, ti mangidadualo iti City Environment and Natural Resources ditoy ciudad ti Laoag, a daytoy ket mangitunda ti risgo kadagiti kayo.
Inbatad na a malaksid kadagiti risgo a mabalin a mangitunda ti insidente kas iti uram mabalin pay daytoy a mangdadael iti aglawlaw.
Kunana a ti panangikabil ti christmas lights ket arigna mangbekkel iti kayo ken sanga na gapo ta dagiti waya ti christmas lights ket mabalin a mangsugat iti kayo nga isu ti mangitunda iti impeksiyon ken agresulta ti pannakatay ti kayo.
Innayon na a no kastoy ti mapasamak ket maapektaran pay dagiti ayup nga agnanaed kadagiti kaykayo.
Kiniddaw ni Pascual a napinpintas nga ikabil dagiti christmas decorations iti sabali a lugar tapno napinpintas ken natalged iti tunggal maysa.
Immuna iti daytoy, nagpanawagan ti Department of Environment and Natural Resources iti publiko a liklikan ti agikabil kadagiti christmas lights kadagiti kayo.
