LAOAG CITY – Inrakurak ni Chinese Ambassador Jing Quan nga agsagsagana ti China iti maikapat a rikos ti bilateral political dialogue kaduana ti Pilipinas iti baet kadagiti report mainaig iti maipagarup a panangipasdek ti istruktura ti China iti Bajo de Masinloc wenno Scarborough Shoal iti West Philippine Sea (WPS).
Ti rakurak ket kagiddan ti report ti maritime monitoring group a SeaLight a nangibaga nga adda dagiti nakita daytoy a pagilasinan ti posible a konstruksion iti nasao a lugar.
Nupay kasta, awan pay ti opisial a rakurak ti Chinese Embassy iti Manila maipanggep iti daytoy.
Inbatad ni Jing nga addan dagiti “positive developments” ti Pilipinas ken China ken gagem ti agsinnungbangir a partido nga ituloy ti panagresolbar kadagiti isyu iti babaen ti maisaysayangkat a dialogue mechanism.
Kabayatanna, awan pay ti inparuk-at nga opisial a rakurak ti Department of Foreign Affairs (DFA) mainaig iti report ti SeaLight.
Agtultuloy nga iberberipikar ti Armed Forces of the Philippines (AFP) ken ni Defense Secretary Gilbert Teodoro dagiti impormasion a nakaipalaon iti report mainaig iti aktibidad ti konstruksion iti Bajo de Masinloc.
Maipalagip a naiwayat ti kaudian a bilateral political dialogue iti nagbaetan ti Pilipinas ken China iti Cebu idi Enero sakbay ti panagsinnarita mainaig iti Code of Conduct iti West Philippine Sea a naiwayat iti nagbaetan ti China ken ti Association of Southeast Asian Nations (ASEAN).
Iti baet daytoy, binabalaw ni Jing dagiti inawaganna nga “anti-China forces” a maipagarup a manglaplapped iti sumaysayaat a relasion ti dua a pagilian.
Kuna ti Ambassador nga adda ti sumagmamano a grupo a maipagarup a mangikagkagumaan a pabayagen ken dadaelen ti koneksion iti nagbaetan ti China ken Pilipinas.
