LAOAG CITY – Inlawlawag ni Mr. Gervy James Gumarit, ti mangidadaulo ti Provincial Communications and Media Office no anya dagiti nakaipalaon iti Executive Order No. 172-22 ni Gov. Matthew Marcos Manotoc.
Segun kenni Gumarit, saanen a kas iti dati a no fully vaccinated ti maysa a tao ket saanen a dumalan iti covidp-19 test.
Inpetteng na a basar iti EO, iti laksid vaccination status ket masapol a mangipakita ti negatibo a resulta ti covid-19 test.
Kunana a kadagiti residente ti Ilocos Norte a rumuar iti nakurkurang ngem 72 nga oras ken fully vaccinated, asymptomatic ket saanen a kasapulan ti testing no agsubli dan iti probinsya.
Inpalgak na nga iti nailanad iti Section 5 iti EO seknan iti panagserrek kadagiti establisyimento, magutgutigot dagiti tattao a saan a rumuar no saan a napateg ti turungen ken maal-allukoy dagiti indoor establishment a kitaen da ti vaccination status ti sumrek.
Inbatad na a saan met a mandar a saan a sumrek dagiti saan pay a bakunado nga indibidual ngem maal-allukoy da a mangipakita ti vaccine card da.
Kabayatanna, kuna ni Gumarit a wagas daytoy tapno maibaga kadagiti tattao a kasapulan nga agbakuna tapno nataltalged no rumuar.
Mainaig iti daytoy, saan met pay a nakaipaay ni Gumarit ti komento seknan iti advisory ti Bangui a panangiyemplementar ti No Vaccination Card, No Entry Policy iti Municipal Hall.
